Әйтеш йомаҡтары

1. -се йомаҡ
   Һорау: Оҙон-оҙон сауылдың
   Осона-башына кем сығыр?
   Сыбар ала көйгәнәк,
   Йомортҡаһын кем йыйыр?
   Морал-морал моралған,
   Тауға барып терәлгән,
   Тау аҫтында татлы таш,
   Татлыһына кинәнгән,
   Ни икәнен кем белгән?

Яуап: Оҙон-оҙон сауылың —
Юл була түгелме һуң?
Сыбар ала көйгәнәк —
Күбәләк түгелме һуң?
Морал-морал моралып,
Төтөн урғылмаймы һуң?
Тау аҫтында татлы таш,
Ул мунса булмаймы һуң? (БХИ)

2-се йомаҡ
Һорау: — Ана бара, эҙе юҡ —
Ул ни булыр, серҙәшем?
Үҙе йөрөй, йәне юҡ —
Ул ни булыр, серҙәшем?

Яуап: Ана бара, эҙе юҡ —
Һыуҙа кәмә түгелме?
Үҙе йөрөй, йәне юҡ —
Сәғәт йөрөү түгелме? (БХИ, Ш, 298)

3-cө йомаҡ
Һорау:Ауыҙы бар, көйшәмәҫ —
Ул ни булыр, сәсәнем?
Арҡаһы бар, аунамаҫ —
Ул ни булыр, ҡәрҙәшем?
Ҡамыл төбө ике айыры —
Ул ни булыр, сәсәнем?
Екән төбө ете айыры —
Ул ни булыр, серҙәшем?

—Яуап: Ауыҙы бар, көйшәмәҫ —
Йылҡы тигән түгелме?
Арҡаһы бар, аунамаҫ —
Һыйыр тигән түгелме?
Ҡамыл төбө ике айыры —
Атаң-әсәң булмаҫмы? —
Екән төбө ете айыры—
Ете ағаң булмаҫмы?