Балыҡ (йомаҡтар)

1. Көмөш тәнле,
   Ите тәмле.
2. Ҡойроғо ергә теймәҫ,
   Һырты көнгә көймәҫ.
3. Эңгей, мәңгей,
   Ҡолаҡтары сәңгей;
   Баҙарға илтеп һатыр инем,
   Дүрт копейки давай динге.
4. Бер атым бар — мәңге-мәңге,
   Ҡойроҡтары — сәңге-сәңге.
   Баҙарға илтеп һатыр инем,
   Сәптер алтын давай динге.
5. Һыуҙа йөҙмәй түҙә алмай,
   Һыу өҫтөндә йөҙә алмай.
   Йөҙмәй түҙмәҫ кем булыр?
   Көмөш күлдәк шул булыр.
6. Яр аҫтында батман ятыр,
   Уны тотҡан Боҫман батыр,
   Боҫман алған бер ҡатын —
   Тәңкәләре шау алтын,
   Тырнаҡтары көмөш-алтын.
7. Яр аҫтынан яу уҙа,
   Һөңгөлө лә мылтыҡлы.
8. Йәне бар, ҡаны бар,
   Һыуһыҙ ерҙә торҙо(н)иһә,
   Йәне лә юҡ, ҡаны ла юҡ.
9. Ҡанаты бар — оса алмай,
   Күккә табан ҡарамай,
   Йондоҙҙарҙы һанамай,
   Ҡоро ерҙә тора алмай.
10. Башы бар — сәсе юҡ,
    Күҙе бар — ҡашы юҡ.
    Ҡанаты бар — оса алмай,
    Болоттарҙы ҡоса алмай.
11. Ана бара, эҙе юҡ,
    Боғаҙлаһаң, ҡаны юҡ.
12. Ҡанаты бар — осмайҙыр,
    Аяғы бар — йөрөмәйҙер,
    Ерҙә тормай, кеше күрмәй,
    Нәфсе шуны теләйҙер.
13. Аяғы юҡ — йөрөй,
    Ҡанаты бар — осалмай
14. Аяҡһыҙ-ҡулһыҙ даръя буйлай.
15. һыуҙа тыуҙы,
    Ерҙә үлде.

Әрселмәгән балыҡ

1. Асылмаған әрйәлә
   Беселмәгән тун ятыр.