Бауырһаҡ

Викидәреслек проектынан
Перейти к навигации Перейти к поиску
Баллы бауырһаҡ

Бауырһаҡ — башҡорт милли аш-һыуы, ҡамыр ризығы. Татар, ҡаҙаҡ һәм башҡа халыҡтарҙа ла таралған.

Кәрәкле аҙыҡ-түлек[үҙгәртергә]

  • Үҫемлек майы (туң май) 1 л
  • Он 450—500 г
  • Йомортҡа 5 дана
  • Тоҙ 1 балғалаҡ
  • Сода 1 семтем
  • Бал 130 г
  • Шәкәр 250 г
  • Һыу 50 г

Әҙерләү ысулы[үҙгәртергә]

Алдан 5 йомортҡаны һыуытҡыстан алып ҡуйырға. Йомортҡалар йылынғас, уларҙы туҫтаҡҡа һытып, күперткәнсе туҡырға. 1 балғалаҡ тоҙ, бысаҡ осонда сода өҫтәргә, унан һуң тағы ла яҡшылап болғатырға. 450—500 грамм ондо яйлап ҡушырға. Йомшаҡ итеп ҡамыр баҫырға. Уның әҙерлеген бысаҡ менән телеп ҡарап белергә мөмкин: киҫелгән урынында күҙәнәкләнеп торһа, ҡамырҙы, еүеш таҫтамал менән ҡаплап, ситкә ҡуйырға.

Ҡаҙанға май ҡойорға, уны ҡайнау хәленә еткерергә һәм һыуытырға.

30 минут ял иткән ҡамырҙы йәйеп, кәрәкле яҫылыҡта киҫәктәргә бүлергә. Ҡаҙанды талғын утҡа ҡуйырға. Йылымыс майға бер нисә киҫәкте һалырға, улар ҡалҡып сыҡҡас, болғап тороп, бешерергә.

Сироп әҙерләү ысулы[үҙгәртергә]

250 г шәкәр ҡомона 50 г һыу ҡушып, ҡайнатырға. Шәкәрле һыу ҡайнап сыҡкас, 130 г бал өҫтәргә һәм тағы яҡынса 15 минут ҡайнатырға.

Сироптың тамсыһы тәрилкәлә ситкә ағып таралмаһа, тимәк, сироп әҙер.

Бауырһаҡҡа эҫе сиропты ҡойорға һәм тәрилкәгә өйөргә.