Күк күкрәү, йәшен йәшнәү, ямғыр (йомаҡтар)

Викидәреслек проектынан
Ямғыр ҡоя ғына
  1. Һарайҙағы һары айғырым
    Һағынғанда кешнәйҙер.
  2. Ағайымдың айғыры тибешә,
    Еңгәмдең үгеҙе һөҙөшә.
  3. Юғарыла яу ҡупҡан.
  4. Дөбөр-дөбөр итер,
    Дөбөрләп китер,
    Ялт-йолт итер,
    Ялтырап китер.
  5. Беренсеһе ялтырай,
    Икенсеһе шалтырай.
  6. Ағайымдың ҡапҡаһы
    Шарт-шорт итеп асылды.
    Ағайымдың кәртәһе
    Ялт-йолт итеп ватылды.
  7. Ҡәҙермәттең ҡапҡаһы
    Шалтырай ҙа шалтырай,
    Ҡолағында алҡаһы
    Ялтырай ҙа ялтырай9.
  8. Ялт итте, йолт итте
    Ағиҙелдең ҡапҡаһы.
    Шарт итте, шорт итте
    Ҡарурмандың арҡаһы.
  9. Ағиҙелдең ҡапҡаһы ялт-йолт итә,
    Ҡарурмандың кәртәһе шарт-шорт итә.
  10. Ҡара ҡаҙ ҡаңҡ-ҡаңҡ итә,
    Ҡанат осо ялт-йолт итә.
  11. Күтәрелде, бәрелде,
    Күк ишеге ярылды.
    Шарт итте, шорт итте,
    Ялт итте, үтеп китте.
  12. Ыу-ыу итә, геү-геү итә,
    Туғыҙ миллионға етә.
  13. Дөбөр-дөбөр Домбай килә,
    Бөтә урамды һелкетеп.
    Домбай артынан еңгәм килә,
    Лыҫтыр еңен һелкетеп.
  14. Дөбөр-дөбөр ҡоҙа килә,
    Бөтә урамды һелкетеп.
    Ҡоҙа артынан мин дә киләм,
    Ике еңем һелкетеп.
  15. Ала ҡаҙы ҡалтыр-ҡолтор,
    Ҡанат осо ялтыр-йолтор.
    Балаһы илай вәр-вәр,
    Танауы ҡанай шар-шар.
  16. Ҡара ҡаҙым ҡаңҡ итте,
    Ҡанат осо ялт итте.
  17. Һаҡмарҙағы һары айғырым
    Һағынып тороп кешнәһә,
    Билтерҙәге биш бейәм,
    Бишеһе лә ҡолонлай;
    Ҡолондары һары ала,
    Тирә-яҡҡа тарала.
    Уны күргән бәндәнең
    Зиһендәре тарала.
  18. Ялт-йолт ялтырай,
    Япан ағас ҡалтырай.
    Ынйы һымаҡ теҙелә,
    Ебәк һымаҡ һуҙыла.
  19. Ағиҙелдә аҫау айғыр
    Урал аша кешнәйҙер,
    Һаҡмарҙағы һары бейә
    Тау һыртынан төшмәйҙер.
    Ҡолондары ҡаралыр,
    Аҡтыр, күктер,
    Һөйөнгән әҙәм күптер.
  20. Тап итте — таба ярылды,
    Шап итте — айран түгелде.
  21. Айыу аҡыра, йөнөн ҡоя,
    Халыҡ һыуға туя.
  22. Бик иркен зәңгәр болон,
    Көтөүсе унда улым.
    Сыбыртҡыһы шарт итә,
    Тирә-яғы ялт итә.