Күҙ (йомаҡтар)

1. Тоҙ тубалында торомтай уйнар.
2. Тоҙло тәгәс эсендә
   Ҡара тубым һикерә.
3. Өй эсендә турғай уйнай.
4. Ҡыл һарайым эсендә
   Ҡылыҡһыҙ атым уйнай.
5. Ике сүлмәккә берәр сүмес.
6. Һыртлау аша ҡамышлы ике күл.
7. Бер яланда ике күл.
8. Тирә-яғы йөнлөкәс,
   Уртаһы баҙлыҡас.
9. Услаһаң — ус тулмай,
   Ебәрһәң — ялан тула.
10. Ике туған торалар,
    Бөтә ерҙе күрәләр,
    Береһен-бере күрмәйҙәр.
11. Ике туған бер-берен күрмәһә лә
    Ғүмер буйы бергә ятып, бергә торалар.
12. Ике туған айырылмай,
    Юл арҡыры торһалар ҙа
    Бер-береһен күрмәй156.
13. Ике ағай рәттән тора,
    Берен-бере күрмәй.
14. Ике ағай йәнәшә баралар,
    Берен-бере күрмәйҙәр.
15. Ике күрше торалар —
    Берен-бере күрмәйҙәр.
16. Йәнәш торалар —
    берен-бере күрмәйҙәр.
17. Ике малай бергә тора
    Берен-бере күрә алмай.
18. Тау артында туғаным,
    Юҡ уны һис күргәнем.
19. Ике килен килендәш,
    Берен-бере күрә алмай.
20. Ике кәрәкле нәмә
    Береһен-бере күрә алмай,
    Көндөҙ асыла, төндә ябыла.
21. Бәләкәс кенә яулығымды
    Ауыл аша ташланым.
22. Сите — ҡамыш,
    Эсе — табыш.
23. Ике сите ҡыллы, уртаһы дымлы.
24. Йылтыр-йылтыр ике таш,
    Уртаһында ҡара таш.
25. Ул күлдәр һиңә таныш,
    Тирәләре гел ҡамыш.
    Ҡамышы көндөҙ һирәк,
    Төндә ҡуйы бигерәк .