Орсоҡ (йомаҡтар)

1. Бәләкәй аҡ көсөгөм йүгерә-йүгерә ҙур булды.
2. Бәләкәй генә тайым бар,
   Бәйҙә тороп һимерә.
3. Бәләкәй генә бер бала
   Йүгерә-йүгерә йөк ала.
4. Бәләкәй генә бер бала
   Йөҙлөк буйлап йүгерә.
5. Бәләкәй генә Ураҙбикә
   Йүгерә-йүгерә йөк ташый.
6. Бәләкәй генә әбей
   Йүгерә-йүгерә еп йыя.
7. Бәләкәй генә бөтмәрсек
   Йүгерә-йүгерә йөк ташый.
8. Бәләкәй генә әбейем
   Йүгерә-йүгерә йыуан булды.
9. Йүгерә-йүгерә йөн йыйыр.
10. Артыҡбикә арымай,
    Әйләнә лә әйләнә,
    Әйләнгән һайын һимерә.
11. Зыр-зыр зырыштырай,
    Зырыштырай, быштырай.
12. Зыр-зыр әйләнә,
    Үҙе килеп бәйләнә.
13. Ҡыҫыр танам бар ине,
    Йүгерә-йүгерә быуаҙ булды.
14. Өйөрөлөп-өйөрөлөп, быуаҙый.
15. Өйөрөлә-өйөрөлә,
    Өйөрөлгән һайын һимерә.
16. Өйҙәге өйрәгем
    Өйөрөлә-өйөрөлә йыуаная.
17. Йүгерә-йүгерә йыуаная.
18. Бәләкәй генә бисура
    Йүгерә-йүгерә быуаҙый.
19. Бәләкәй генә киленсәк
    Әйләнә-тулғана быуаҙый.
20. Бәләкәй генә ҡәйнә
    Бейей-бейей һимерә.
21. Бей һаҡалын кимерә,
    Бейей-бейей һимерә.
22. Үҙе йөрөй — атламай,
    Өйөрөлөүҙән туҡтамай.
23. Йомаҡ ҡойҙом юл менән,
    Юрғалаттым ҡул менән.

Орсоҡ башы

1. Эсе ҡыуыш, тышы таш.
2. Уҡый-уҡый, уҡый баш,
   Эсе ҡыуыш, тышы таш.
3. Өфөй-өфөй, өфөй таш,
   Эсе ҡыуыш, тышы таш,
   Уны белмәгән ҡыҙҙарҙың
   Башына тейер ошо таш.
4. Бәләкәй генә йомро баш,
   Эсе ҡыуыш, тышы таш.