Сәғәт (йомаҡтар)

1. Көн үткәнде кем белә?
   Мин онотһам, ул белә.
2. Иртә лә, кис тә —
   Һәр ваҡыт эштә,
   Хәл йыймай һис тә.
3. Ағайым алған бер ҡатын,
   Бармаҡтары шау алтын,
   Түңәрәк йөҙлө,
   Уҡа һырлы.
4. Барабыҙ ҙа барабыҙ,
   Урыныбыҙҙа ҡалабыҙ.
5. Көн китә, төн китә,
   Энә буйы ер китә.
6. Үҙе йәнһеҙ,
   Көн бара, төн бара,
   Бер ҡарыш ер бара.
7. Аҡылы бар, йәне юҡ.
8. Аҡылы юҡ,
   Йәне юҡ,
   Үҙе кешегә иҫәп өйрәтә.
9. Ағиҙелдең аръяғында
   Ун ике ҡара ҡаҙ уйнай.
10. Ары ләйләй,
    Бире ләйләй,
    Эйәк аҫты биҙәкәй,
    Күрмәнеңме, Зәйнәкәй?
11. Ары тә-тә,
    Бире тә-тә,
    Бүрәнәлә ҡандала.
12. Ашамай, эсмәй — көнө-төнө эшләй.
13. Йәне юҡ — йөрөй.
14. Үҙе йәнһеҙ,
    Көн бара, төн бара.
15. Аяғы юҡ — йөрөй,
    Теле юҡ — һөйләй.
16. Ауыҙы юҡ — теле бар.
17. Бер туҡтамай йөрөһә лә
    Бер урындан китә алмай.
18. Келт-келт йөрөй —
    Урынынан китә алмай.
19. Келт-келт итә, үтеп китә,
    Ризыҡ-нәфҡәләрен әйтеп китә.
20. Күк һарайҙың эсендә
    Күк күгәрсен гөрөлдәй.
21. Бер башта ун ике күҙ.
22. Ала аяҡ, йомро таяҡ,
    Уртаһында тел — һин уны бел.
23. Бер урында баҡа ултыра, һикерә-һикерә — китә алмай.
24. Бара-бара тауҙан ашмай.
25. Бара-бара, һаман барып етә алмай.