Социалистик хеҙмәт тураһында
Һауаларҙан ишетелә
Самолет батырҙары,
Һәр бер эштә еңеп сыға
Беҙҙең ил батырҙары.
Ботинкаһы, ботинкаһы,
Ботинкаһы ҡыҙыл суҡ.
Ударник булһаң, йөрөйөм,
Ударник булмаһаң - юҡ.
Ҡыҙарып бешкән алманың
Һайланым матурҙарын.
Ударник тип беҙ атайбыҙ
Колхоздың батырҙарын.
Ағиҙелдә аҡ нәмә бар,
Аҡ пароход түгелме?
Ярышып эшләү, күмәк эшләү
Шатландыра күңелде.
|
Ударниктар эшкә бара
Йырлашып та, гөрләшеп,
Йырлайыҡ әле, йрлайыҡ,
Их, дуҫтарым, берләшеп.
Өҫтөмдәге күлдәгемдең
Табалманым үҙ ишен,
Матурлығыңды арттыра
Ударник тигән исем.
Мендем тауҙың башына,
Исемем яҙҙым ташына,
Өйөбөҙҙә - электрик,
Ҡырыбыҙҙа - машина.
Колхоз ере туғай-туғай,
Унда һайрай бер турғай.
Тормош иркен, күңелдәр көр,
берҙе йырламай булмай.
|
Урал буйҙары йәмле,
Урал һыуҙары тәмле.
Урал буйына теҙелгән
Колхоз ҡырҙары йәмле.
Беҙҙең колхоз байрағы
Ебәк менән сигелгән.
Байраҡ беҙгә ярыгтарҙа
Еңгән өсөн бирелгән.
Тау-тау боҙҙар ағып килә
Яҙҙың ташыуҙарында,
Шатланышып беҙ эшләйбеҙ
Колхоз баҫыуҙарында.
Өҫтөмдәге күлдәгемдең
Табалманым үҙ ишен,
Матурлығыңды арттыра
Ударник тигән исем.
|
Сығанағы: Йырҙар китабы. Башҡортостан китап нәшриәте. Өфө-1968. Өсөнсө баҫма. Төҙөүсеһе Хөрмәт Биҡҡолов. 234-235 биттәр
