Ат тояҡтары, ҡойроғо, ҡолаҡтары, күҙе (йомаҡтар)

Ат тояҡтары

1. Дүрт бабай,
   Дүртеһенең дә
   Һаҡалы артҡа ҡарай.
2. Бәләкәй генә сеүәтә
   Хандан хәбәр йөрөтә.

Ат тояғы, ҡойроғо, ҡолаҡтары, ике күҙе

1. Дөбөр-дөбөр дүртәү,
   Һәпән ағай яңғыҙ;
   Көлкәс ағай икәү,
   Төймә һабағы икәү.

Аттың тояғы, ҡолағы, ҡойроғо

1. Дөбөрәт ағай дүртәү,
   Килекәй ағай икәү,
   Яппар ағай япа-яңғыҙ.

Аттың тояғы, даға ҡаҙаҡтары, ҡойроғо

1. Табыр-төбөр дүртәү,
   Төймә ҡаҙаҡ бишәү,
   Ағай-энеһе алтау,
   Һәбләй эте яңғыҙ.

Ат ҡойроғо

1. Һыуға төшһә — мең,
   Һыуҙан сыҡһа — бер.