Ай (йомаҡтар)

1. Ағас башында көмөш алҡа.
2. Ағас башында алтын йөҙөк,
   Уның бер яртыһы өҙөк.
3. Күктә тора кәүҙәһе,
   Ергә төшә шәүләһе.
4. Көндөҙ йоҡлай, кис уяна.
5. Өй башында ярты икмәк.
6. Ҡапҡа башында
   Ҡобрам мөгөҙө.
7. Ябыҡ тирмәлә ярты икмәк.
8. Бәләкәй генә икмәк
   Бөтә ғәләмгә етә.
9. Күк һыйырҙа көмөш мөгөҙ.
10. Кәштә башында аҡ ҡалас.
11. Кәштә башында ярты күмәс.
12. Тәгәс тулы аҡ май.
13. Күк тирмәлә көмөш ырғаҡ элдем.
14. Төндә йылмая, көндөҙ юғала.
15. Төндә түтәй ҡалҡынған,
    Ҡарап ҡала артымдан.
16. Төндә ауыҙын йыра,
    Таң атһа, юғала.
17. Ураҡ түгел — кәк(е)ре,
    Ҡояш түгел — яҡты.
18. Бер ҡараһаң, кителер,
    Бер ҡараһаң, бөтәйер —
    Үҙен күрә бөтә ер.
19. Бер мәлендә ул — йом(о)ро йомғаҡ,
    Бер мәлендә ул — нәҡ ураҡ.
    Арымай ҙа, талмай ҙа,
    Йөрөй гел ерҙе урап.
20. Ҡай ваҡыт ҡояш кеүек,
    Ҡай ваҡыт ураҡ кеүек.
21. Кирәгәм башы аҡ яулыҡ.
22. Кирәгәм осо асыла төштө,
    Аҡ тәңкәһе сәселә төштө.
23. Төпһөҙ даръя төбөндә көмөш беләҙегем ята.
24. Күк яланда тай эҙе, ярылып ята бер үҙе.
25. Тигеҙ ерҙә тай эҙе.
26. Үҙенең нуры юҡ, кешенән нур ала.
    Урландыҡ нур менән кем шулай алдана?